Ilulunsad ngayong Pebrero ng GMA Network ang GMA News TV, ang all-news TV station na magbibigay ng walang patid na balita sa buong Pilipinas. Ito ang ipapalit sa QTV11, ang all-women show TV sa bansa. Sa pagkakaalam natin bago makipag-partner noon ang GMA Network sa ZOE TV 11 ni Bro. Eddie Villanueva ng JIL ito ang kanilang orihinal na plano.
Magiging kapanapanabik ang isyung ito dahil tatapaan ng GMA ang ANC ng ABS-CBN na ipinalalabas sa Sky Cable lamang. Nauna rito naglabas na rin ng anunsiyo ang TV5 ni Manny Pangilinan na ilulunsad din nila ang kanilang all-news station na AKSIYON TV sa UHF channel 41. Ang channel 11 ay isang VHF channel.
Si Nessa Valdellon ang mangunguna sa istasyong ito at asahan na natin dahil kasama pa rin ang mga anchors mula sa GMA 7 na sina Jessica Soho, Mike Enriquez, Mel Tiangco, Arnold Clavio, Vicky Morales and Howie Severino. Makakasama din sina Kara David at Prof. Winnie Monsod.
Sina Malou Mangahas, Sheila Coronel, Marites Vitug at Ed Lingao ng PCIJ naman ang tutulong para sa pagtalakay ng mga mahahalagang isyu pagdating sa mga dokumentaryo.
